ជំងឺឫសដូងបាតគឺជាជំងឺដែលកើតឡើងដោយសារការរីកប៉ោងនៃសរសៃឈាម ដែលមាននៅជុំវិញក្រសាលគូថ។ គេសង្កេតឃើញថា ជំងឺឬសដូងបាតជាមូលហេតុចម្បងទី១ ដែលនាំឲ្យអ្នកជំងឺមកពិគ្រោះជាមួយគ្រូពេទ្យ ចំពោះបញ្ហា ផ្នែកក្រសាលគូថ។ ជំងឺឫសដូងបាតនេះមិនអាចវិវត្តទៅជា ជំងឺមហារីកបាននោះទេ។
- ជំងឺឫសដូងបាតមាន ២ប្រភេទគឺ៖
– ឫសដូងបាតក្រៅៈ ជាជំងឺដែលកើតឡើងលើសរសៃឈាម ឫសដូងបាតនៅខាងក្រៅរន្ធគូថ
– ឫសដូងបាតក្នុងៈ ជាជំងឺដែលកើតឡើងលើសរសៃឈាម ឬសដូងបាតខាងក្នុងរន្ធគូថ
- តើមានវិធីអ្វីខ្លះដើម្បីព្យាបាលជំងឺឬសដូងបាត?
ក) ចំពោះបញ្ហាឫសដូងបាតខាងក្រៅ៖
អ្នកជំងឺអាចត្រូវបានព្យាបាលដោយប្រើថ្នាំគ្រាប់បំបាត់ហើម និងបំបាត់ការឈឺចាប់រួមទាំងថ្នាំបន្ទន់លាមក ក្នុងពេល ជាមួយគ្នានោះអ្នកជំងឺអាចប្រើក្រែម (Crème) សំរាប់លាប លើដុំនោះ។ ពេលខ្លះគ្រូពេទ្យអាចធ្វើការកាត់យកកំណក ឈាមនៃឬសដូងក្រៅនោះចេញ បើសិនជាដុំឬសដូងបាត ក្រៅមិនហើមខ្លាំង ហើយមានតែមួយដែលធ្វើឲ្យអ្នកជំងឺបាន ធូរស្បើយពីការឈឺចាប់ភ្លាមៗ។
ខ) ចំពោះបញ្ហាឫសដូងបាតក្នុង៖
ការព្យាបាលចម្បងគឺការព្យាបាលទៅលើបញ្ហាបន្ទោបង់ លាមកមានដូចជាការទល់លាមកឬការរាគ។ មានឧបករណ៍ ៣យ៉ាង ដែលអាចព្យាបាលជំងឺឫសដូងបាត មានដូចជាៈ
– ការដុតកំដៅ (Infrarouge photocoagulation)
– ការចាក់ (Sclérothérapie)
– ការចង (Ligature)
ការព្យាបាលដោយឧបករណ៍ អាចអាស្រ័យទៅលើ ដំណាក់កាលរបស់រោគសញ្ញាឫសដូងបាតៈ
- ដំណាក់កាលទី ១ : អាចព្យាបាលដោយការដុតកំដៅឬ ការចាក់
- ដំណាក់កាលទី ២ និងទី៣ : អាចព្យាបាលដោយការចង
- ចំពោះការវះកាត់ឬសដូងបាត គឺធ្វើឡើងចំពោះឬសដូងបាតនៅកម្រិតទី ៤ ឬ ឫសដូងបាតដែលបរាជ័យក្នុងការព្យាបាលដោយឧបករណ៍ទាំង៣ ខាងលើ ។
* បញ្ជាក់៖ ជំងឺឫសដូងបាត មិនមែនជាជំងឺកាចសាហាវទេ វា គ្រាន់តែរំខានដល់អ្នកជំងឺ ប៉ុន្តែអ្នកជំងឺត្រូវជួបពិគ្រោះជាមួយ គ្រូពេទ្យឯកទេសឲ្យបានត្រឹមត្រូវដើម្បីបញ្ជាក់ថាពិតជាជំងឺឫសដូងបាតមែន ហើយការព្យាបាលទៀតសោតត្រូវព្យាបាល ឲ្យបានត្រឹមត្រូវ ព្រោះវាអាចបង្កឲ្យមានផលវិបាកក្រោយ ព្យាបាល ដូចជាការព្យាបាលដោយការចាក់ បើសិនជាព្យាបាលមិនត្រឹមត្រូវទេអ្នកជំងឺអាចមានដំបៅនៅរន្ធគូថឬ អាចស្នៀតក្រសាលគូថដែលជាបញ្ហាធ្ងន់ធ្ងរ។
“ ព្យាបាលទាន់ពេលវេលា ដោយគ្រូពេទ្យជំនាញ នាំមកនូវការសះស្បើយឆាប់រហ័ស” ៕
ប្រភព ៖ មន្ទីរពេទ្យកាល់ម៉ែត
